धुळ्यात पाणी मिश्रित पेट्रोलची विक्री

तक्रारींनंतर पेट्रोल विक्री थांबली

नागिन्द मोरे | धुळे

धुळे शहरातील सौजन्य पोलिस पेट्रोल पंपावर वाहन चालकांनी पेट्रोल भरुन वाहन चालवले मात्र काही अंतरावर गेल्यावर वाहने अचानक बंद पडत असल्याच्या तक्रारी पुढे आल्या. त्यानंतर पेट्रोल पंप मॅनेजरने पेट्रोल कंपनीशी बोलून ग्राहकांच्या तक्रारी ऐकून पेट्रोल बदलून दिले.

वाहन चालकांनी आपापली वाहने गॅरेजमध्ये दाखवल्यानंतर वाहनाच्या पेट्रोल टँकमध्ये पेट्रोल सोबत पाणी असल्याचे उघड झाले. यानंतर वाहनधारकांनी पेट्रोल पंपावर धाव घेऊन तपासणी केली असता पाणी मिश्रित पेट्रोलची विक्री होत असल्याचं निदर्शनास आलं. तर अनेक वाहनधारकांनी पेट्रोल बाटलीत घेतले आणि पाहणी केली तर काय पाणी मिश्रित पेट्रोलची विक्री होत असल्याचे दिसून आलं.

पेट्रोल भरलेल्या वाहनचालकाच्या तक्रारी आणि गर्दी पेट्रोल पंपावर वाढत गेल्या. यावेळी ग्राहकांच्या अनेक तक्रारी ऐकून घेतल्यानंतर शेवटी पेट्रोल विक्री थांबवण्यात आली. यानंतर पेट्रोलची तपासणी करण्यात आली परंतु त्यात पाणी आढळलेच नाही, तर मग इतक्या ग्राहकांच्या पेट्रोल टाकीमध्ये पाणी आले कुठून.? हा प्रश्न यावेळी निर्माण झाला. यावेळी पेट्रोल पंपावर ग्राहकांची मोठ्या प्रमाणात गर्दी झाल्यानंतर पोलिसांना या ठिकाणी पाचारण करण्यात आलं. यानंतर पेट्रोल पंपांचे मॅनेजर पटेल यांनी संबंधित प्रकरणासंदर्भात आलेल्या ग्राहकांचे समाधान करण्यासाठी आणि आपल्या पेट्रोलमध्ये पाणी नाही हे सांगण्यासाठी प्रात्यक्षिक देखील करून दाखवले.